تاج من المؤجلات

الإخوة الكرام هذا التاج يعد بالنسبة لكم قديما وأجاب عنه جمع من من الفضلاء والفضليات ودعانى إليه عدد منهم أذكر على سبيل المثال لا الحصر

الأخت زهراء صاحبة مدونة فزلوكة والأخت بذرة أمل والأخ خبيب فجزا الله عنى الجميع كل خير

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى

لعلى أختار عصر البطل صلاح الدين الأيوبى فقد جمع إلى مناصرة السنة وقمع البدعة إحياء للجهاد وجمع شمل الامة

أول أولوية فى حياتك عيلتك ولا شغلك ولا اصحابك؟

لو ضرورى الترتيب يبقى البيت أولا

ايه أكتر حاجة بتحبيها فى رمضان ؟

مضاعفة أجر الأعمال لأن بطبعى دة بيشجعنى أكتر

اوصف أجمل فطار ممكن تفطره؟

تمر مع ماء زمزم فى رحاب أحد الحرمين

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل

ممكن أكون عادل أو أفضل محمد زى ما انا

عفوا

هحاول أكون عادل بس طبعا هاجتهد فى إختيار مساعدين ومعاونين عشان نقدر نحقق العدالة كمنظومة عملية

طبعالما أجد ان الأمانة موكلة لأهلها ولما أجد أن الإنتقادات تصل إلى من غير تزويق وفلترة وأقدر أتواصل مع كل الفئات بسهولة يبقى أنا على طريق الصواب

مين أكتر اعلامى مصرى بتحترمه ؟

أحمد منصور

لو ممكن تشتغل شغلانة تانية كنت تتمنى تبقى ايه

مدرس لغة عربية بس فى الأزهر الشريف

ايه تانى بلد تتمنى تعيش فيها بعد مصر ؟؟

المدينة المنورة

اوصف ترتيبات اجمل فرح ممكن تحضره

الأفراح البسيطة الخالية مما نستحى منه أمام الله

بتراعى كلام الناس والقيل والقال ؟؟ ولو اه او لا قول ليه

أحيانا

بس لو هيتسبب فى مخالفة للثوابت الدينية بعمل مطنش ومبيهمنيش زعل حد

أنا دينى هو وطنى وأهلى وكلام الناس مش هيخلص

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد

طبعا يا جماعة دة أمل حياتى

هو الحياة كانت بسيطة زمان ودة فى حد ذاته يناسبنى

عندك أمل ؟ اسبابك ؟

عندى أمل فى الله

أسبابى ببساطة إن الوعد بالنصر والتمكين من الله ومن النبى المعصوم

لما بتحب تهرب من كل شئ بتروح فين ؟؟

بروح بعيد وأختلى بنفسى وأمارس عبادة النظر فى بديع الخلق الإلهى والتفكر فى مظاهر القدرة الإلهية

امتى اول مرة خدت فيها نفس طويل وقلت ياااه انا فعلا كبرت ؟؟

لما تخرجت من الجامعة ولقيت نفسى عندى دور دينى وإجتماعى لابد من التخطيط له والإستعداد لتبعاته

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟

أبدا ولما بشوف مدخن أشفق عليه وأدعو له بالمعافاة منها

بتعرف ايدك اليمين من الشمال ازاى ؟؟

لما بكون عاوز اليمين تبقى التانية هى الشمال

ايه اكتر الة موسيقية بتحبها

لا شئ

فى رأيك ليه الذوق والنخوة اتعدموا؟؟

مقولتش كدة بالعكس موجودين وإقرأوا تدوينة قولو للناس حسنا عند المهندس عصفور المدينة

ايه الحاجة اللى لو حصلت لك حتبقى سعيد اوى ؟

الإسلام يحكم بلاد المسلمين ننعم بعدله ونرفع رؤسنا فخرا به

تحب يبقى عندك ارض زراعية ولااجدد عربيات ولاكام عمارة ولافلوس فى البنك ؟

كام عمارة

البحر ولا النيل

النيل

مركب ولا طيارة؟

مركب

مجنون ولا عاقل

قول إنت بقى

مجنون أحيانا بس نفسى أبقى عاقل علطول

تقرا كتاب ولا تتفرج على فيلم ؟

كتاب مهما كان بسيطا هيكون عندى أفضل من فيلم

تمرر التاج ده لمين ؟

لكل من لم يجبه من قبل